मुख्यमन्त्रीले लगाएका आरोपहरू सत्य हुन् भने कानूनी कारबाही अगाडि बढाइयोस्, एसडीएफले पूर्ण सहयोग गर्नेछ

गान्तोक, 27 फरवरी। मुख्यमन्त्री प्रेमसिंह तामाङले एसडीएफ सरकारमा जति पनी हत्या, हिंसा, कुटपिट र तोडफोडका घटनाहरू भएका थिए, ती सबै पवन चामलिङ र एसडीएफ सरकारले घटाएको हो भनी आरोप लगाएकोमा सिक्किम डेमोक्रेटिक फ्रण्ट (एसडीएफ) पार्टीले कडा आपत्ति जनाएको छ। एसडीएफ सरकारमा यदि उक्त आपराधिक घटनाहरू घटाइएका छन् भने वर्तमान एसकेएम सरकारले ती सबै केसहरु रि-ओपन गरेर कानूनी कारबाही अगाडि बढाउन सक्ने एसडीएफले चुनौती दिएको छ।एसडीएफ वरिष्ठ उपाध्यक्ष (प्रचार) कृष्ण खरेलले आज जारी एक प्रेस विज्ञप्ति यस आसयको जानकारी गराएका छन्। वर्तमान मुख्यमन्त्रीले आफ्ना सम्बोधनहरूमा बारम्बार पूर्वको एसडीएफ सरकारमाथि यस्ता आरोपहरु लगाउने गरेको बताउँदै सिक्किमको पुलिस विभाग र न्याय प्रणालीले किन मुख्यमन्त्रीका उक्त आरोपहरूलाई गम्भीरतापूर्वक नलिएको भनी प्रश्न गरेको छ। एसडीएफले सिक्किम पुलिस प्रशासन र न्यायालयलाई मुख्यमन्त्रीका वक्तव्यहरुलाई गम्भीरतापूर्वक लिएर सुमोटो केस दर्ता गर्न र कारबाही अगाडि बढाउन माग गरेको छ।रम्फूमा हिजो आयोजित एक कार्यक्रममा मुख्यमन्त्रीले उक्त आरोपहरू दोहोर्याएको उल्लेख गर्दै यदि मुख्यमन्त्रीका आरोपहरु सत्य हुन् भने पीडितहरूलाई न्याय दिलाउने पहलमा एसडीएफ पूर्ण रुपमा सहयोग गर्न तयार रहेको विज्ञप्तिमा जनाइएको छ। तर, यदि उक्त घटनाहरूलाई मुख्यमन्त्रीले राजनीतिक रङ दिएर खस जातिको भावनात्मक शोषण मात्र गरिरहने कृत्य गरेका हुन् भने उक्त बयानहरू निन्दनीय र आपत्तिजनक रहेको एसडीएफले बताएको छ।एसडीएफले भनेको छ, ‘एसकेएम सरकार गठन भएको सात वर्ष पुगिसकेको छ। आरोप लगाउने काम एसकेएम पार्टीको विपक्षमा हुँदादेखिको हो। तर, अहिलेसम्म आरोप मात्र लगाएर उक्त घटनालाई रफादफा गरिंदैछ। पीडितलाई न्यायका दिनका लागि केस रि-ओपन किन भएन? किन दोषी माथि कारबाही भएन?’ मुख्यमन्त्रीले आफ्नो जिम्मेवारी र अधिकार क्षेत्रभित्रको काम नगरेर केवल आरोप मात्र लगाइरहेको एसडीएफले बताएको छ। एसडीएफले वर्तमान सरकारलाई उक्त घटनाहरूमा संलग्न दोषीहरू विरुद्ध झट्ट कारबिही गर्न जोड्दार माग गरेको छ।