रूप नारायण राई, चन्द्र खालिङ लगायत अन्यहरू एसडीएफ त्यागेर एसकेएम पार्टीमा सामेल, मुख्यमन्त्रीले जनाए स्वागत

गान्तोक, 02 फरवरी । सिक्किम क्रान्तिकारी मोर्चा (एसकेएम) पार्टीले आगामी 4 फरवरीका दिन आफ्नो 14औं स्थापना दिवस पालन गरिरहेको छ। यस अघि एसकेएम पार्टीमा सामेल हुने व्यक्तिहरूको क्रम जारी रहेको छ। आज पनि विभिन्न राजनीतिक दलका कार्यकर्ताहरूले एसकेएम अध्यक्ष तथा मुख्यमन्त्री पीएस तामाङलाई भेट गरेर पार्टीमा सामेल भएका छन्।
मुख्यमन्त्रीले आज सामाजिक सञ्जाल फेसबुक पोस्टमा उक्त जानकारी साझा गरेका छन्। विगत केही दिनदेखि सिक्किमका विभिन्न राजनीतिक दलका कार्यकर्ताहरूले एसकेएम अध्यक्ष तथा मुख्यमन्त्रीलाई भेटेर पार्टीमा सामेल भइरहेका छन्। सामेल हुनेहरूमा एसडीएफ पार्टी लगायत सीएपी, कांग्रेस आदि राजनीतिक दलका कार्यकर्ताहरू रहेका छन्।
एसडीएफ पार्टीका वरिष्ठ नेतृत्वहरू रूप नारायण राई, चन्द्र खालिङ र डा. शिव कुमार शर्मा एसकेएम पार्टीमा सामेल भएका छन्। यसरी नै सबिन वाकचाली राई, जिग्मी वाङचुक भोटिया, पवन सोताङ राई, पीएन शर्मा, लक्षुमण भट्टराई, भुपाल राई, अशोक बागदास, गर्जमान गुरुङ, उदय मिश्रा लगायत अन्यहरूले पनि एसडीएफ त्यागेर एसकेएम पार्टीमा सामेल भएका छन्।
यस अतिरिक्त, सिटिजन एक्सन पार्टीका प्रशान्त राई, विकी ढुङमाली राई, जिग्मी नामग्याल भोटिया र मिलन खाती पनि एसकेएम पार्टीमा सामेल भएका छन्।
मुख्यमन्त्री तामाङले सबैलाई एसकेएम पार्टीमा स्वागत जनाउॅंदै जनताका आकांक्षाहरूलाई पूरा गर्न मिलेर काम गरौं भनी आह्वान गरेका छन्।