गान्तोक, 29 अगस्त। राष्ट्रिय खेल दिवस 2025 को अवसरमा आज राजधानीको पाल्जोर स्टेडियममा तीन दिवसीय समारोह शुरू भयो। राज्य खेलकुद एवं युवा मामिला विभागद्वारा सर्वकालीन महान फिल्ड हक्की खेलाडी मानिने मेजर ध्यान चन्दको जयन्तीको सम्मानमा आयोजित समारोहमा खेलकुद एवं युवा मामिला विभाग मन्त्री राजु बस्नेत मुख्य अतिथि थिए।
मुख्य अतिथि मन्त्री बस्नेतले आफ्नो सम्बोधनमा विद्यार्थीहरूलाई फिटनेश र अनुशासनको मूल्यप्रति सचेत नागरिकको रूपमा उल्लेख गरे। उनले प्रविधिको दुरुपयोग जस्ता सामाजिक चुनौतीहरूलाई सम्बोधन गर्न शारीरिक फिटनेश र मानसिक शक्ति आवश्यक रहेको बताउँदै इमानदारीपूर्वक प्रतिज्ञा पालना गर्न आग्रह गरे।
उनले खेलकुदलाई सन्तुलित जीवनलाई समर्थन गर्ने जीवन ऊर्जाको रूपमा वर्णन गर्दै उपस्थित सबैलाई कम्तीमा एउटा खेल अपनाउन र दैनिक एक घण्टा शारीरिक गतिविधिमा समर्पित गर्न सल्लाह दिए। उनले मुख्यमन्त्री प्रेमसिंह तामाङको नेतृत्वमा खेलकुदमा वृद्धि भइरहेको र खेलाडीहरूले समर्थन प्राप्त गरिरहेको बताए। राज्य सरकारले सहयोग प्रदान गर्न जारी राख्ने बताउॅंदै उनले युवाहरूलाई सिक्किमको खेलकुद क्षेत्रको विकासका लागि अवसरहरूको प्रयोग गर्न प्रोत्साहित गरे।
कार्यक्रमलाई खेलकुद एवं युवा मामिला विभागकी सचिव याङ्छेन डी. तामाङ र अतिरिक्त निदेशक आरबी विश्वकर्मले पनि सम्बोधन गरेका थिए। पहिलो दिनको समारोहमा सेवानिवृत्त संयुक्त सचिव छबिलाल राई, कराटे प्रशिक्षक बिधान बल्लभ सुब्बा, ग्यात्सोला भोटिया र फुर्बा तेन्पा लाचेन्पालाई खेल क्षेत्रमा योगदानको लागि सम्मानित गरियो।
बिहानको सत्रमा विभिन्न खेलकुद प्रतियोगिताहरू आयोजन गरियो, जसमा वान माइल रन, पासिङ द बल, टग अफ् वार आदि आयोजन गरिएको थियो। प्रतियोगिताका विजेता र उपविजेताहरूलाई अतिथिहरूको बाहुलीद्वारा पुरस्कृत गरियो। दिउॅंसो एक्स होस्टेलर्स एसएसए बनाम स्टेट एकाडेमी टीमबीच एक प्रदर्शनी फुटबल म्याच सम्पन्न गरियो, जसमा एक्स होस्टेलर्स 3–1 ले विजय बन्यो।
यस अवसरमा स्वास्थ्य, अनुशासन र शारीरिक कल्याणमाथि जोड दिॅंदै सामूहिक रूपमा फिट इण्डिया शपथ ग्रहण गराइएको थियो। समारोहमा गान्तोकका विधायक दिले नामग्याल बर्फुङ्पा, गान्तोककी उपमेयर छिरिङ पाल्देन भोटिया, मुख्यमन्त्रीका राजनीतिक सचिव जेकब खालिङ आदि उपस्थित थिए।
