विभिन्न विपक्षी राजनीतिक दलहरूबाट एसकेएममा सामेल हुनेहरूलाई स्वागत

गान्तोक, 01 फरवरी । सिक्किम क्रान्तिकारी मोर्चा (एसकेएम) ले पार्टीमा सामेल हुनेहरू सम्पूर्ण नयाँ सदस्यहरूलाई स्वागत जनाउॅंदै अभिनन्दन व्यक्त गरेको छ। एसकेएमले समावेशी नीति र एकताको राजनीतिलाई व्यवहारमा उतार्ने काम गरेकोमा पार्टी अध्यक्ष तथा मुख्यमन्त्री प्रेमसिंह तामाङलाई पनि धन्यवाद दिएको छ।
एसकेएम साहित्य प्रकोष्ठ महासचिव परशु ढकालले आज जारी एक प्रेस विज्ञप्तिमा पार्टी अध्यक्ष तथा मुख्यमन्त्री प्रेमसिंह तामाङको दूरदर्शी नेतृत्व र समावेशी राजनीतिक अवधारणाले सबै वर्ग, समुदाय र विचारधाराका नागरिकहरूलाई एउटै लक्ष्यतर्फ एकताबद्ध गर्दै समान अवसर प्रदान गरिरहेको बताएका छन्।
यही समावेशी भावनाको प्रतिफलस्वरूप आज एसडीएफ पार्टीका वरिष्ठ उपाध्यक्ष टासी ग्याछो भोटिया एसकेएम पार्टीमा औपचारिक रूपमा सामेल भएको उनले बताएका छन्। एसकेएमले उनको यो निर्णयलाई सिक्किमको समसामयिक राजनीतिक इतिहासमा एउटा महत्त्वपूर्ण र निर्णायक मोड़का रूपमा लिएको उनले उल्लेख गरेका छन्।
उनले विभिन्न विपक्षी राजनीतिक दलहरूबाट एसकेएम पार्टीमा प्रवेश गर्ने क्रम जारी रहेको बताउॅंदै पार्टीप्रति विश्वास प्रकट गर्ने सम्पूर्ण नयाँ सदस्यहरूलाई स्वागत तथा अभिनन्दन व्यक्त गरेका छन्। उनले जनताको हित, कल्याण र समग्र विकासप्रति प्रतिबद्ध एसकेएम पार्टी सबैको समान सहभागिताबाट सुशासनयुक्त, समृद्ध र सशक्त सिक्किम निर्माण गरौँ भन्ने मूल मन्त्रमा अडिग रहेको बताएका छन्।