सरकारले व्यवहारिकताभन्दा प्रचारलाई र सुशासनभन्दा देखावटीपनलाई प्राथमिकता दिएको सीएपीको आरोप

गान्तोक, 01 जून। सिटिजन एक्शन पार्टी (सीएपी) सिक्किमले राज्यमा लागू गरिएको अड-इभन प्रतिबन्ध फिर्ता लिएको निर्णयलाई स्वागत गरेको छ। सीएपीले उक्त निर्णय फिर्ता लिनु भनेको सरकारको उक्त कदम कमजोर सोच, त्रुटिपूर्ण कार्यान्वयन तथा सर्वसाधारण नागरिकको वास्तविक अवस्थासँग पूर्ण रूपमा असम्बद्ध रहेको स्वीकारोक्ति हो भनी ठहर गरेको छ।सीएपी सिक्किमले आज जारी प्रेस विज्ञप्तिमा प्रधानमन्त्री नरेन्द्र मोदीले इन्धन संरक्षण तथा मितव्ययिताको आह्वान गर्दा सिक्किमका जनताले जिम्मेवार शासनको अपेक्षा गरेका थिए तर, एसकेएम सरकारले कुनै वैज्ञानिक अध्ययन, सार्वजनिक परामर्श, प्रशासनिक तयारी वा जनजीवनमा पर्ने प्रभावको मूल्याङ्कन नगरी हतारमा अड-इभन नियम लागू गरेको आरोप लगाएको छ। सरकारको निर्णयका कारण सिक्किमका जनसाधारणले धेरै कठिनाइहरू र ठूलो आर्थिक नोक्सानी बेहोर्नुपररेको दाबी गरिएको छ। विज्ञप्तिमा भनिएको छ, सीएपीले प्रधानमन्त्रीको आह्वानलाई जनतालाई दुःख दिने माध्यम वा राजनीतिक प्रदर्शनको साधन नबनाउन चेताउनी दिएको थियो। दुर्भाग्यवश, सरकारले व्यवहारिकताभन्दा प्रचारलाई र सुशासनभन्दा देखावटीपनलाई प्राथमिकता दियो। सीएपीले सर्वसाधारण नागरिकहरूलाई कडाइका साथ नियम पालना गर्न लगाइएको तर, त्यही नियमको वकालत गर्ने नेतृत्वहरू स्वयंले कतिपय अवस्थामा त्यसको पालना नगरेको देखिएको पनि दाबी गरेको छ। सीएपीले सरकारको मितव्ययिता उपायहरूलाई भ्रामक बताउँदै वास्तविक मितव्ययिता भनेको माथिल्लो तहबाट अनावश्यक खर्च कटौती, सरकारी फजुल खर्च नियन्त्रण, अत्यधिक खर्चिलो कार्यक्रमहरूमा कमी तथा सार्वजनिक स्रोतहरूको दुरुपयोग रोक्नबाट शुरु हुन्छ भनी बताएको छ। सरकारले मितव्ययिताको भार बढ्दो महँगी र आर्थिक अनिश्चिततासँग जुधिरहेका सर्वसाधारण जनतामाथि थोपेको पनि आरोप लगाएको छ।