गान्तोक, 03 मई। विधायक तथा आईपीआर विभागका सल्लाहकार एलबी दासले विश्व प्रेस स्वतन्त्रता दिवस 2025 को महत्वपूर्ण अवसरमा सबै मिडिया व्यवसायीहरू, पत्रकारहरू, सम्पादकहरू, फोटो पत्रकारहरू र पत्रकारिताको महान क्षेत्रसँग सम्बन्धित सबैलाई हार्दिक बधाई एवं शुभकामना व्यक्त गरेका छन्।
सल्लाहकार दासले आज जारी आफ्नो सन्देशमा भनेका छन्, यस दिनले हामीलाई प्रेस स्वतन्त्रताको आधारभूत सिद्धान्तहरूको सम्झना गराउँछ- जुन कुनै पनि लोकतान्त्रिक समाजको आधारशिला हो। प्रेसले जनताको आवाज, सत्यको सतर्क संरक्षक र शासन र सार्वजनिक जीवनमा पारदर्शिता, जवाफदेहिता र न्याय सुनिश्चित गर्न एक शक्तिशाली साधनको रूपमा काम गर्दछ।
विधायक दासले चुनौती र प्रतिकूलताहरूबीच मिडिया कर्मचारीहरूले दैनिक रूपमा प्रदर्शन गर्ने साहस, समर्पण र नैतिक जिम्मेवारीप्रति सम्मान व्यक्त गरेका छन्। समाजलाई सूचित, शिक्षित र सशक्त बनाउन मिडियाको अथक प्रयासले सूचित नागरिकलाई आकार दिन तथा हाम्रो राज्य र राष्ट्रको लोकतान्त्रिक संरचनालाई सुदृढ पार्न महत्त्वपूर्ण भूमिका खेल्छ भनी उनले आफ्नो सन्देशमा उल्लेख गरेका छन्।
उनले सिक्किम सरकारको सूचना तथा जनसम्पर्क विभागको सल्लाहकारको रूपमा प्रेस स्वतन्त्रताको मूल्यमान्यतालाई कायम राख्न मेरो अटल समर्थन र प्रतिबद्धताको पुन: पुष्टि गरेका छन्। उनले इमानदारीमा फस्टाउने पत्रकारिता, आवाज नदबाइने र हरेक शीर्षकमा सत्य चम्किरहने वातावरण सिर्जना गर्न मिलेर काम गरौं भनी आह्वान पनि गरेका छन्। उनले बलियो र प्रबुद्ध समाजको लागि स्वतन्त्र, निष्पक्ष र जिम्मेवार प्रेसको पालनपोषण गरिरहन सकौं भनी कामना पनि गरेका छन्।
