‘राष्ट्रिय डाक्टर्स डे’ मा वृक्षारोपण, राज्यपाल बने सहभागी

गान्तोक, 01 जुलाई । ‘राष्ट्रिय डाक्टर्स डे’ को अवसरमा आज राजधानीको हेलेन लेप्चा चिकित्सा महाविद्यालयमा इण्डियन मेडिकल एसोसिएशनको सिक्किम शाखाले एक विशेष वृक्षारोपण कार्यक्रमको आयोजना गऱ्यो। कार्यक्रममा राज्यपाल ओमप्रकाश माथुर मुख्य अतिथिका रूपमा सहभागी भए। उनले मानव स्वास्थ्य र पर्यावरण संरक्षणको प्रतीक स्वरूप जापानी सकुरा चेरीको बिरुवा लगाए।
कायक्रममा क्षेत्र विधायक कला राई, स्वास्थ्य विभागका सल्लाहकार अर्जुन घतानी, आयोजक संस्थाका पदाधिकारीहरू, स्वास्थ्य विभागका अधिकारीहरू लगायत अन्यहरू उपस्थित थिए।
राज्यपाल माथुरले आफ्नो सम्बोधनमा डाक्टरहरूलाई बधाई दिॅंदै भने, ‘डाक्टरहरू समाजका सच्चा रक्षक हुन्, जसले मानव जीवनको रक्षाका लागि निरन्तर सेवा र समर्पणको परिचय दिन्छन्।’ उनले भने, ‘आजका दिन वृक्षारोपण अभियान स्वास्थ्य र पर्यावरणको अद्भुत संगमको प्रतीक हो। यसले जसरी डाक्टरहरूले जीवन बचाउॅंछन्, उसैगरी वृक्षले पनि धरतीलाई जीवन प्रदान गर्दछ भन्ने दर्साउॅंछ।’
राज्यपालले हेलेन लेप्चा चिकित्सा महाविद्यालयको स्थापना राज्यको लागि ऐतिहासिक उपलब्धि रहेको बताए। उनले भने, ‘यो संस्थान भविष्यमा सिक्किमको स्वास्थ्य क्षेत्रको नयॉं पहिचान बन्नेछ।’ उनले वृक्षारोपणको सराहना गर्दै भने, ‘यो प्रयास चिकित्सा जस्ता नोबल प्रोफेशनलाई पर्यावरण संरक्षणसॅंग जोड्ने एक दूरदर्शी कदम हो।’
राज्यपालले सबै डाक्टर, चिकित्सा कर्मी र विद्यार्थीहरूलाई शुभकामना दिॅंदै बिरुवा लगाउनका साथै यसको सुरक्षा र पोषणमा पनि ध्यान दिन आह्वान गरे। यस अघि राज्यपालले महान चिकित्सक डा. विधानचन्द्र रायको प्रतिमामा पुष्पाञ्जलि अर्पित गरेका थिए।