सिक्किममा कुनै सङ्गठित आतङ्कवादी मड्यूल वा स्थानीय चरमपन्थी नेटवर्क सक्रिय छैन: सिक्किम पुलिस

गान्तोक, 01 जुलाई। सिक्किम पुलिसले राज्यमा कुनै सङ्गठित आतङ्कवादी मड्यूल वा स्थानीय चरमपन्थी नेटवर्क सक्रिय रहेको प्रमाण नभेटेको स्पष्ट गरेको छ। यसैगरी, सिक्किम पुलिसले राज्यमा सार्वजनिक सुरक्षा वा साम्प्रदायिक सद्भावलाई कुनै प्रकारको खतरा पनि नरहेको दाबी गरेको छ।
स्मरण रहोस्, राजधानीबाट कथित चरमपन्थी नेटवर्कसॅंग सम्बन्धित एक युवकलाई पक्राउ गरिएको समाचार प्रकाशमा आएपछि राज्यमा हलचल मचेको छ। यस्तो समयमा सिक्किम पुलिसले राज्यमा सङ्गठित आतङ्कवादी मड्यूल वा स्थानीय चरमपन्थी नेटवर्क सक्रिय रहेको प्रमाण नभेटेको बताएपछि राज्यवासीहरूले राहत महसुस गरेका छन्।
अर्कातिर, अहिलेसम्मको जॉंचमा पक्रा परेका युवक विभिन्न डिजिटल प्लेटफर्महरूको माध्यमद्वारा स्वयं कट्टरपन्थीतिर ढल्किएको खुलेको बताइएको छ। यसैगरी, उक्त युवकले लगातार चरमपन्थी प्रचार सामग्रीहरू ग्रहण गर्नुका साथै यस्ता सामाग्रीहरूको अनलाइन माध्यमद्वारा प्रचार गर्ने प्रयास पनि गरेको आशंका व्यक्ति गरिएको छ। सिक्किम पुलिसले युवकको सम्भावित अन्तरराज्यीय र अन्तरराष्ट्रिय डिजिटल लिङ्केजहरू पत्ता लगाउन जॉंच गरिरहेको बताइएको छ।
सिक्किम पुलिसले आज जारी गरेको प्रेस विज्ञप्तिमा केन्द्रिय गुप्तचर एजेन्सीहरूसँगको निकट समन्वयमा राज्य विशेष शाखा मार्फत प्राप्त विश्वसनीय गुप्तचर जानकारीको आधारमा जॉंच शुरू गरिएको बताएको छ। जानकारीहरूको आधारमा कारबाही गर्दै सिक्किम पुलिसले गोप्य प्रमाणीकरण गरेपछि मुद्दा दर्ता गरेर विस्तृत जॉंच शुरू गरिएको बताएको छ।
सिक्किम पुलिसका वरिष्ठ अधिकारीहरूको निरीक्षणमा उप-पुलिस अधीक्षक मिंग्युर टेम्पो नादिकको नेतृत्वमा जॉंच भइरहेको बताइएको छ। कानुनी रूपमा जफत गरिएका इलेक्ट्रोनिक उपकरणहरू र डिजिटल प्रमाणहरूको वैज्ञानिक परीक्षणले लामो समयदेखि आरोपी युवकले अनलाइन प्लेटफर्महरू मार्फत चरमपन्थी प्रचार ग्रहण गर्दै आएको र यस्ता सामग्रीबाट प्रभावित भएको थाहा लागेको छ। यी निष्कर्षहरूको फोरेन्सिक परीक्षण र कानुनी छानबिन जारी रहेको जानकारी गराइएको छ।
सिक्किम पुलिसले अहिलेसम्मको जॉंचमा यो घटना अनलाइन आत्म-कट्टरपन्थ जस्तो देखा परिरहेको बताएको छ। हाल सिक्किम राज्यभित्र कुनै सङ्गठित आतङ्कवादी मोड्युल, स्थानीय कट्टरपन्थी नेटवर्क वा साम्प्रदायिक पक्षको कुनै प्रमाण नभेटिएको स्पष्ट गरेको छ।
राष्ट्रिय अनुसन्धान एजेन्सी ऐन, २००८ को धारा ६ अनुसार, कानून बमोजिम वैधानिक प्रतिवेदन मूल्याङ्कनको लागि सक्षम अधिकारीहरूलाई पठाएको बताइएको छ। सिक्किम पुलिसले कानून बमोजिम जॉंच जारी राखेको छ। सिक्किम पुलिसले नागरिकहरूलाई राज्यमा सार्वजनिक सुरक्षा, साम्प्रदायिक सद्भाव वा कानून व्यवस्थामा तत्काल खतराको संकेत गर्ने कुनै पनि गुप्तचर सूचना नरहेको स्पष्ट गरेको छ।