पाकिम, 10 अगस्त। दोस्रो आमा सम्मान दिवसको अवसरमा मुख्यमन्त्री प्रेमसिंह तामाङले महिला, बालबालिका, ज्येष्ठ नागरिक तथा दिव्याङ्गजन कल्याण विभागअन्तर्गत सञ्चालित आमा सशक्तीकरण योजनाका तीन उत्कृष्ट लाभार्थीलाई ‘प्रगतिशील आमा सम्मान पुरस्कार’ प्रदान गरेका छन्।रम्फू खेल मैदानमा आज आयोजित कार्यक्रममा मुख्यमन्त्रीको विवेकाधीन अनुदान अन्तर्गत स्थापित प्रगतिशील आमा पुरस्कार प्रदान गरिएको हो। योजनाअन्तर्गत प्राप्त आर्थिक सहयोगको जिम्मेवार उपयोग गर्दै दृढ़ता, संघर्षशीलता तथा उल्लेखनीय उपलब्धि हासिल गर्ने लाभार्थी आमाहरूलाई प्रोत्साहित तथा सम्मान गर्ने उद्देश्यले यो पुरस्कार स्थापना गरिएको जनाइएको छ।यस योजना अन्तर्गत प्रथम पुरस्कार गेजिङ जिल्लाको कलुक बजार निवासी इन्द्र लेप्चाले प्राप्त गरिन्। यसैगरी, दोस्रो पुरस्कार पाकिम जिल्लाको लिङ्के पारखा निवासी गौरी प्रधान र तेस्रो पुरस्कार मंगन जिल्लाको माङसीला तिबुक निवासी सन्चरानी लिम्बूले प्राप्त गरेका छन्। पुरस्कार विजेताहरूलाई क्रमशः 5 लाख, 3 लाख र 2 लाख रुपियाँ प्रदान गरिएको छ।तीनै जना लाभार्थीलाई उद्यमशील भावना, योजनाबाट प्राप्त आर्थिक सहयोगको प्रभावकारी सदुपयोग तथा उल्लेखनीय उपलब्धिका लागि सम्मान गरिएको हो। पुरस्कारले आमा सशक्तिकरण योजनाबाट प्राप्त सहयोगलाई मेहनत, लगनशीलता र दृढ़ताका माध्यमबाट दिगो जीविकोपार्जनको अवसरमा रूपान्तरण गर्न सफल आमाहरूको योगदानलाई कदर गरेको छ। साथै, उनीहरूको उद्यमशीलता र उपलब्धिले राज्यका अन्य आमाहरूलाई पनि आत्मनिर्भर बन्न प्रेरणा प्रदान गर्ने विश्वास व्यक्त गरिएको छ।
