गान्तोक, 20 मई । भारतीय जनता पार्टी (भाजपा) को सिक्किम प्रतिनिधिमण्डलले आज माखा-डिक्चु सडक विस्तार परियोजनाको निर्माणमा संलग्न शिवालिक कम्पनीको कार्यालय भ्रमण गरेर परियोजना कार्यान्वयनमा रहेका चुनौतीहरूबारे जानकारी लिॅंदै वर्तमान सडक अवस्थाबाट प्रभावित जनताको वास्तविक चासोलाई उठाएको छ।
भाजपा सिक्किमका अनुसार, प्रतिनिधिमण्डल टोलीमा प्रदेश महासचिव दिनेश नेपाल, सचिव निरेन भण्डारी, गान्तोक जिल्ला अध्यक्ष पेम्पो लेप्चा, निर्वाचन क्षेत्र प्रभारी पूर्ण कुमार न्योपाने, कार्यकारी पासाङ ग्याली शेर्पा, मण्डल अध्यक्ष प्रेम छेत्रीलगायत पार्टी कार्यकर्ताहरू सामेल थिए।
अन्तरक्रियाको क्रममा प्रतिनिधिमण्डलले खराब सडक अवस्था, यात्रुहरूले भोग्नुपरेको कठिनाई, प्रभावित क्षेत्रहरूमा घरहरूमा क्षति, स्कूल जाने बालबालिकाको यातायातमा कठिनाई र तुमिन खोलादेखि बराङसम्मको परम्परागत सिँचाई च्यानलमा क्षति जस्ता महत्वपूर्ण सार्वजनिक मुद्दाहरूलाई उजागर गऱ्यो।
कम्पनीले प्रतिनिधिमण्डललाई आगामी १० दिनभित्र सवारी साधनको सहज आवतजावत सुनिश्चित गर्न सडक मर्मत र हिलो सफा गर्ने काम गरिने आश्वासन दियो। प्रतिनिधिमण्डलले स्कूलका विद्यार्थीहरूको लागि पनि यातायात व्यवस्थाको अनुरोध गर्यो, जसमा कम्पनीले आवश्यक सहयोगको आश्वासन दिएको छ।
जनताको चिन्ताको गम्भीरतालाई ध्यानमा राख्दै भाजपा सिक्किमले चाँडै नै गान्तोक जिल्लाका जिल्लापाललाई भेटेर जिल्ला प्रशासन, शिवालिक कम्पनी, बीआरओ, स्थानीय पञ्चायतहरू, राजनीतिक दलका प्रतिनिधिहरू, प्रभावित नागरिकहरू र समुदायका प्रतिनिधिहरू सम्मिलित संयुक्त निरीक्षणको माग गर्ने बताइएको छ।
