जूम सालघारीमा 117 जना एसकेएम पार्टीमा सामेल भएको दाबी

गान्तोक, 28 जनवरी । जूम सालघारी निर्वाचन क्षेत्रबाट विपक्षी पार्टीहरू त्यागेर कूल 117 सदस्य सिक्किम क्रान्तिकारी मोर्चा (एसकेएम) पार्टीमा सामेल भएको बताइएको छ। जोरथाङको पार्टी कार्यालयमा आज आयोजित एक कार्यक्रममा क्षेत्र विधायक मदन सिञ्चुरीले नयाँ सदस्यहरूलाई स्वागत जनाए। एसकेएमद्वारा आज जारी प्रेस विज्ञप्तिमा उक्त जानकारी दिइएको छ।
आफ्नो सम्बोधनमा विधायक सिञ्चुरीले पार्टीमा सामेल भएका सदस्यहरूलाई बधाई दिँदै एउटै परिवार भएर कार्य गर्न प्रोत्साहित गरे। उनले भने, ‘एसकेएम समावेशी राजनीति गर्ने पार्टी हो।’ उनले सिक्किमेली जनताको हितमा एसकेएम सरकारले प्रारम्भ गरेका पहलबारे जानकारी गराए।
कार्यक्रमलाई एसकेएममा सामेल हुने पूर्व पञ्चायत केबी राई, विनोद राई, अमिर राई अनि राजीव थुलुङले सम्बोधन गरेका थिए। उनीहरूले पार्टी अध्यक्ष एवं मुख्यमन्त्री प्रेमसिंह तामाङको दूरदर्शी नीति अनि जनकल्याणमुखी विचारको खुलेर प्रशंसा गरेको बताइएको छ।
कार्यक्रममा वरिष्ठ नेता तथा सिक्किम राज्य ब्याङ्कका सल्लाहकार बिरेनचन्द्र राई, मुख्यमन्त्रीका प्रेस सचिव युगेन तामाङ, सोसियल मिडिया अध्यक्ष नवीन दाहाल, राज्यस्तरीय युवा संयोजक खगेन राई, सीएलसी अध्यक्ष राजेश राई लगायत पार्टीका सक्रिय सदस्यहरुको उपस्थिति रहेको थियो