रिम्बीमा ठूलो पैह्रो, सडक सम्पर्क अवरुद्ध, मानवीय क्षति भएन

गेजिङ, 02 सेप्टेम्बर । गेजिङ जिल्लाअन्तर्गत रिम्बी-सिङ्गलिताम ग्राम पञ्चायत एकाईमा पर्ने रिम्बीमा बुधबार बिहान गएको ठूलो पैह्रो गयो। पैह्रोका कारण ७२औँ बटालियन सशस्त्र सीमा बल (एसएसबी) मुख्यालयसँगको सडक सम्पर्क पूर्ण रूपमा अवरुद्ध भएको छ।
एसएसबीका अनुसार, २ सेप्टेम्बर बिहान लगभग ६ः३० देखि ७ बजीको बीचमा ७२औँ बटालियन मुख्यालयबाट अनुमानित ४.५ किलोमिटर टाढा रिम्बी क्षेत्रमा ठूलो पैह्रो गयो। पैह्रोसॅंगै सिक्सा खोलाबाट आएको ठूलो पानीको बहावले गेजिङ-पेलिङ-युक्सम मार्ग (स्टेट हाइवे-२७) को सडकमा क्षति पुर्‍याएको छ।
पैह्रोका कारण ७२औँ बटालियन मुख्यालयतर्फको सडक सम्पर्क पूर्ण रूपमा विच्छेद भएको छ भने उक्त मार्गमा सवारीसाधनको आवागमन ठप्प भएको छ। सौभाग्यवश घटनामा मानवीय क्षति वा सम्पत्तिमा क्षति भएन।
प्रभावित स्थलको ७२औँ बटालियनका कमान्डेन्ट, गेजिङका जिल्लाका जिल्लापाल, गेजिङका सहायक पुलिस अधीक्षक, विद्युत् विभागका अधीक्षक अभियन्ता, सडक तथा पुल निर्माण विभागका कार्यकारी अभियन्ता, वन विभागका प्रतिनिधि तथा रिम्बी जीपीयूकाका अध्यक्ष मंगल राईले संयुक्त निरीक्षण गऱ्यो।
निरीक्षणका क्रममा अधिकारीहरूले पैह्रोबाट उत्पन्न अवस्था, सडक अवरोधको अवस्था तथा सडक सम्पर्क पुनःस्थापनाका लागि आवश्यक कदमबारे मूल्याङ्कन गरेका थिए। प्रभावित मार्ग पुनः सञ्चालनका लागि आवश्यक काम शुरु गरिएको बताइएको छ।
गेजिङका जिल्लापालको अनुरोधमा युक्समस्थित ७२औँ बटालियन एसएसबीको उद्धार तथा राहत टोलीसहित बटालियनका अन्य सुरक्षाकर्मीहरूलाई प्रभावित क्षेत्रमा परिचालन गरियो। टोलीले जिल्ला प्रशासन तथा सम्बन्धित कार्यान्वयन निकायसँग समन्वय गर्दै पैह्रोको माटो तथा भग्नावशेष हटाउने, प्रभावित सडक सफा गर्ने र सडक सम्पर्क पुनःस्थापना गर्ने कार्यमा सहयोग गऱ्यो। साथै, आवश्यकताअनुसार तत्काल सहयोग उपलब्ध गराउन आरआरटी टोलीले स्थानीय प्रशासनसँग निरन्तर समन्वय गरिरहेको जनाइएको छ।
गेजिङ-पेलिङ-७२औँ बटालियन-युक्सम सडक पुनः सञ्चालन गर्न थप सडक निर्माण तथा पुनःस्थापनाको काम शुरु गरिएको छ। स्थलको अवस्था तथा कामको प्रगतिका आधारमा सडक सम्पर्क पुनःस्थापित गर्न करिब ३ देखि ४ दिन लाग्ने अनुमान गरिएको छ। क्षतिग्रस्त लगभग ३० मिटर लामो सडक तथा पुल खण्डको पुनर्निर्माण गरी उक्त मार्गलाई भारी सवारीसाधन सञ्चालनका लागि पूर्ण रूपमा उपयुक्त बनाउन भने करिब ३ देखि ४ महिना लाग्ने अनुमान गरिएको छ।
७२औँ बटालियन एसएसबी, युक्समले नागरिक प्रशासन तथा सम्बन्धित विभागसँग नजिकको समन्वयमा घटनास्थलको अवस्थालाई निरन्तर निगरानी गरिरहेको बताइएको छ। आरआरटी टोली तथा बटालियनका अन्य सुरक्षाकर्मीहरू प्रभावित क्षेत्रमा तैनाथ रहँदै सडक सम्पर्क पुनःस्थापना तथा सुरक्षाकर्मी र स्थानीय बासिन्दाको सुरक्षा एवं हित सुनिश्चित गर्न सम्भव सबै सहयोग प्रदान गरिरहेका छन्।