गान्तोक, 11 मई। भारतीय जनता पार्टी, सिक्किमद्वारा आज तथाङचेनमा अन्तरराष्ट्रिय मातृ दिवस पालन गर्दै समाजलाई आकार दिने आमाहरू र मातृ व्यक्तित्वहरूको अमूल्य योगदानको सम्मान गरियो। सेवा र सम्पर्क अभियान अन्तर्गत एक कार्यक्रममा उपस्थित आमाहरूबीच केक काटेर कार्यक्रमको शुरूवात गरियो, साथै उपस्थित असाधारण महिलाहरूलाई उनीहरूको निःस्वार्थ प्रेम र समर्पण भावको सराहना गरिएको प्रेस विज्ञप्तिमा उल्लेख छ।
सामाजिक कल्याणप्रतिको आफ्नो प्रतिबद्धतालाई अघि बढाउँदै भाजपा सिक्किमले यस अवसरमा आयुष्मान भारत र ई-श्रम का लागि विशेष कार्ड अभियान चलाएको थियो, जसको प्रमुख उद्देश्य आमाहरू र वरिष्ठ नागरिकहरूलाई स्वास्थ्य सेवा र सामाजिक सुरक्षा लाभहरू प्रदान गर्नका साथै उनीहरूमाझ मोदी सरकारको कल्याणकारी योजनाहरूअन्तर्गत पाउनुपर्ने लाभ सुनिश्चित गर्नु रहेको थियो।
भाजपा प्रदेश डीआर थापाको नेतृत्वमा पार्टीले वरिष्ठ नागरिकहरू र समग्र समुदायको कल्याणलाई प्राथमिकता दिइरहेको विज्ञप्तिमा बताइएको छ। पार्टीको जनकल्याणप्रतिको समर्पणले समावेशी समाज निर्माणको दृष्टिकोणलाई प्रतिबिम्बित गर्दै जनताको सेवा गर्ने र उनीहरूलाई सम्मानित जीवनका लागि आवश्यक स्रोतहरूले सशक्त बनाउने आफ्नो प्रतिबद्धतालाई निरन्तरता दिँदै आएको जनाइएको छ।
गान्तोक जिल्ला अध्यक्ष पेम्पो दोर्जी लेप्चा तथा स्यारी मण्डल अध्यक्ष कर्मा ल्हेन्डुप भेटियाको तत्परतामा आयोजित आजको कार्यक्रममा प्रवक्ता पासाङ ग्याली शेर्पा, मिडिया प्रभारी निरेन भण्डारी, कार्यकारी साङ्गे पल्जरलगायतका पदाधिकारीगण साथै पार्टीको प्राविधिक टोलीको सक्रिय सहभागिता रहेको थियो।
