सिटिजन एक्सन पार्टी सिक्किमको तुमिन-लिङ्गीमा क्षेत्रस्तरीय समन्वय सभा सम्पन्न

गान्तोक, 29 जुलाई। सिटिजन एक्सन पार्टी (सीएपी) सिक्किमको क्षेत्रस्तरीय समन्वय सभा आज तुमिन-लिङ्गी निर्वाचन क्षेत्रअन्तर्गत अप्पर साम्दोङमा पार्टी अध्यक्ष गणेश राईको अध्यक्षतामा सम्पन्न भयो।आफ्नो अध्यक्षीय सम्बोधनका क्रममा पार्टी अध्यक्ष गणेश राईले वर्तमान सरकारमा वित्तीय अनुशासनको अभाव रहेको आरोप लगाउँदै यस कारण राज्यको वर्तमान मात्र नभई भविष्यसमेत प्रभावित भएको बताए। उनले तथ्याङ्कसहित आफ्नो धारणा प्रस्तुत गर्दै ऋणको भार बढ्दै गएको, सत्तानजिक रहेका सीमित व्यक्तिहरू मात्र आर्थिक रूपमा लाभान्वित भएको तथा आम नागरिकमाथि अत्यधिक करको भार थोपारिएको आरोप लगाए। साथै, उनले राज्यको अर्थतन्त्र कमजोर बन्दै गएको र कानुन-व्यवस्था पनि लथालिङ्ग भएको आरोप लगाए। उनले राज्यको पुनर्निर्माण तथा आर्थिक र सामाजिक समृद्धिका लागि सीएपी सिक्किमलाई साथ दिन सम्पूर्ण सिक्किमवासीसँग आह्वान गरे। सभामा तुमिन लिङ्गी निर्वाचन क्षेत्रका सात परिवार अनि सिङ्ताम खाम्दोङका चार परिवार विभिन्न राजनीतिक पार्टी त्यागी सीएपीमा सामेल भएको बताइएको छ। नवप्रवेशी सदस्यहरूलाई माल्यार्पण गर्दै पार्टी अध्यक्ष गणेश राईले स्वागत गरे।सभामा तुमिन-लिङ्गी निर्वाचन क्षेत्रका तीनवटा वार्डमा युबीसी गठन पनि गरिएको प्रेस विज्ञप्तिमा उल्लेख छ। सभालाई पेमा ग्याल्पो भोटिया, ओङ्देन छिरिङ लेप्चा, ललित गुरुङ, बिरबल तामाङ तथा सोमबहादुर राईलगायत नेताहरूले पनि सम्बोधन गरेका थिए।