गान्तोक, 29 अगस्त। मुख्यमन्त्री प्रेमसिंह तामाङको मार्गदर्शनमा आजदेखि ‘कानुनी सहयोग अभियान’ शुरू गरिएको छ। रिनाक निर्वाचन क्षेत्रको रोडाथाङ बजारमा आयोजित कार्यक्रममा मुख्यमन्त्रीका सल्लाहकार बिष्णु कुमार खतिवडा मुख्य अतिथिको रूपमा उपस्थित रहेका थिए।
मुख्यमन्त्री कार्यालयकी कानुनी परामर्शदाता पुजा लामिछानेले कार्यक्रम आयोजनको औचित्यमाथि विस्तृत रूपमा प्रकाश पार्दै यो पहलले समुदाय स्तरमा कानूनी समस्याहरूलाई सम्बोधन र समाधान गर्ने लक्ष्य राखेको बताइन्, जसले मानिसहरूको घर दैलोमा सोझै सहयोग प्रदान गर्नेछ।
मुख्यमन्त्रीको सुनौलो, समृद्ध र सक्षम सिक्किमको दृष्टिकोण अनुरूप नशामुक्त सिक्किम अभियान र महिलाहरूलाई उनीहरूको कानूनी हकका बारेमा राम्रोसँग जागरूक गराउने माध्यमबाट सशक्त बनाउनु रहेको उनले जानकारी गराइन्। जनताको घर दैलोमै कानुनी सहयोग पुऱ्याउनु र कानुनी अधिकारबारे जानकारी दिन यो कार्यक्रमको मुख्य उद्देश्य रहेको उनले बताइन्। रिनाक निर्वाचन क्षेत्रको रोडाथाङबाट सुरु भएको यो अभियान राज्यभरका सबै निर्वाचन क्षेत्रमा विस्तार हुने जानकारी गराउँदै उनले व्यक्तिहरू विशेष गरी ग्रामीण क्षेत्रहरूमा नि:शुल्क कानुनी सुविधा उपलब्ध गराउनु रहेको बताइन्।
यो पहलले आधारभूत कानूनी अधिकारहरूको बारेमा जागरूकता फैलाउने बालबालिकालाई यौन अपराधहरूबाट सुरक्षाको लागि रहेको कानून पोक्सो ऐन, मादक पदार्थ विरूद्धको अधिकार, घरेलु हिंसा कानून र महिलाहरू एवं बाल बालिकालाई संरक्षण गर्ने विभिन्न कानून र मानसिक स्वास्थ्य देखभालको बारेमा मानिसहरूलाई शिक्षित गर्नु रहेको छ, जसले आत्महत्या दर घटाउन मद्दत पुऱ्याउने बताइन्।
यसैगरी कानुनी सहायता र घरेलु हिंसाबारे अधिवक्ता तथा बार एसोशियसन अफ सिक्किमका महासचिव प्रितम छेत्रीले प्रकाश पारेका थिए। एन्टी ड्रग ऐन र एफआईआर विषयमा रिनाक पुलिसका एसएचओ अविनाश लामिछानेले जानकारी गराए। यसैगरी पोक्सो ऐन र मानव तस्करी विषयमा बार एसोसिएशन अफ सिक्किमका अध्यक्ष तथा अधिवक्ता टासी राप्देन बर्फुङपाले विस्तृत रूपमा अवगत गराए।
सोही प्रकारले गान्तोक महानगरपालिकाकी उपमेयर छिरिङ पाल्देन भोटिया र मुख्यमन्त्रीका सल्लाहकार बिष्णु कुमार खतिवडाले सम्बोधन गर्दै कानुनी सहयोग अभियानको शुरूवातको निम्ति मुख्यमन्त्री प्रेमसिंह तामाङप्रति हार्दिक कृतज्ञता प्रकट गर्दै यस कार्यक्रमबाट लाभ उठाउन सबैप्रति आह्वान गरे।
यस अवसरमा उपस्थित सर्वसाधरण जनता र कानुनी विज्ञहरूमाझ एक अन्तरक्रिया पनि सम्पन्न भएको एसकेएम प्रचार प्रसार अध्यक्ष रञ्जना प्रधानले प्रेस विज्ञप्तिमा बताएकी छन्।
